Rekomendasyon rin ng Philippine Energy Summit ang pagkakaroon ng alternatibong langis at iba pang pagkukunan ng enerhiya na malinis at renewable tulad ng solar, wind, mini hydro, at iba pang bio-energy. Maging ang pagkakaroon ng nukleyar na planta ng kuryente ay lumabas ding isang opsyon. Itong mga rekomendasyon ay tumutugon din diumano sa problema sa climate change o global warming. Biofuels naman ang pino-promote sa alternatibong langis. Sa katunayan ay may batas na tungkol dito. Ilang halimbawa ng mga pagkukunan nito ay jatropha, tubo (sugarcane), mais, at malunggay.
Sa usapin ng malinis at renewable na enerhiya, malaking tanong kung bakit sa kabila ng matagal nang proposal na i-develop ang paggamit sa solar energy, wala pa ring gaanong suporta ang ibinubuhos para dito ng gobyerno natin. Bilang isang bansang nasa tropical region at matindi ang sikat ng araw, napakalaki ng potential ng solar energy. Mas magiging kapaki-pakinabang at cost-efficient ito laluna sa mga lugar na hindi konektado sa national grid ng kuryente. Sa halip, ang isang maingay na proposal ngayon ng gobyerno na pinalalabas na suportado ng mga siyentipiko ay ang paggamit ng nukleyar na enerhiya. Malaki lang raw ang gastos sa pagtatayo ng planta nito sa simula, pero lumalabas na higit na mas mura ang halaga ng kuryenteng nagmumula dito kalaunan. Mas malinis din daw itong klase ng enerhiya. Ginamit na halimbawa pa ang Japan kung saan mahigit singkwenta ang nuclear power plants doon pero hanggang ngayon ay hindi pa nangyayari ang disgrasya tulad ng sinapit sa Chernobyl sa Soviet Union noong 1986.
Sa paggamit na halimbawa sa Japan, dapat ding tingnan ang klase ng gobyerno kung ihahalintulad ang paggamit ng nuclear power plant doon sa pwedeng mangyari rin dito sa Pilipinas. Hindi tulad ng Japan, ang Pilipinas ay kilala sa korupsyon at hindi maayos na pamamahala. Sa korupsyon pa lang, maaaring ikapapahamak na natin ito dahil posibleng sub-standard ang mga materyales na gamitin at hindi maayos ang pagkakatayo ng nuclear plant.
Marami ang tutol sa pagtatayo ng nuclear power plants sa bansa dahil sa posibleng ikapapahamak ng buhay ito ng komunidad na malapit doon sakaling pumutok ito o magkaroon ng disgrasya tulad ng sinapit sa Chernobyl kung saan ang isang nuclear reactor ay pumutok at nagresulta sa iba pang mga pagsabog sa planta na naging sanhi ng malaking sunog sa lugar at naging sanhi ng pagkakaroon ng radioactive fallout ng mga sumabog na particles sa ere. Hindi lang sa lugar sa Soviet Union umabot ang mga maliliit na radioactive particles. Ang aksidenteng ito na ang tinaguriang pinakagrabeng nangyari sa isang nuclear power plant na nagresulta sa kamatayan ng maraming tao at hanggang ngayon ay dala-dala pa rin ng mga nabubuhay ang hindi magandang epekto nito sa kalusugan tulad ng pagkakaroon ng cancer.
Sa usapin naman ng biofuels, ang posibleng epekto ng pagtatanim ng mga halaman para pagkunan ng fuel sa seguridad sa pagkain ang naging karaniwang subject ng presentasyon sa summit ukol sa alternative fuel. Ang usaping pagkain o fuel kasi ang karaniwang diskusyon sa usapin ng biofuels. Ang samahan ng mga magsasaka at maging ang isang negosyanteng nasa sugarcane industry na nagbigay ng presentasyon sa summit ay sumasang-ayon na sa pagtatanim ng para sa biofuels. Subalit ang samahan ng mga magsasaka ay may pasubali pa rin. Ayon sa kanila, dapat pag-aralan pa ring mabuti ang epekto ng pagtatanim para sa biofuels sa produksyon ng pagkain sa bansa.
Ang jatropha pala ay malakas sa tubig, bukod pa sa mataas daw ang level ng toxicity nito o yung nakakalason sa tanim na ito. Maganda rin namang magkaroon tayo ng alternatibong pagkukunan ng langis sa bansa, pero dapat ay hindi naman masasakripisyo ang ating pagkain at kaligtasan laluna ng mga nagtatanim nito. Ang malunggay ay isa marahil magandang mapag-aralan at ma-develop pa. Ang bunga pala nito kasi ang pagkukunan ng fuel. Ibig sabihin, pwede pang magamit ang masustansiya nitong mga dahon – maaaring pagkain o kaya ay fertilizer.
February 11, 2008
Inihanay sa: BIOFUEL, Energy Summit | Minarkahan: alternative fuel, biofuels, Philippine Energy Summit, renewable energy
